I woas, i red scho relativ oft von meine Zähnd. Weil’s ma hoid a relativ oft weh tan, de zwanzg oda dreißg, oda wüvü i hoid ho. Mei Schwesta hod gmoant, des kunnad an meine nigelnagineichn Weisheitszähnd lieng. Und i? I soitad am besten sofort zum Zauhnarzt geh, weil i dem gaunzen Prozedere jo do ned auskimm. Jiatzt de gaunze Zeit mit Schmerzn umadumzrenna is a ned grod Sinn da Sache.

Oba damit i hoibwegs normal durch’n Tog kimm, nimm i hoid entweder Aspirin oder Parkamed. Und wauns grod amoi gaunz schlimm is, nimm i hoid jeweils zwa. Des is zwoa ned so guad, oba is hoid a a Möglikeit, dass i durchin Tog kimm. Jiatzt is übrigens grod de letzte Wochn vom Züvüdienst aubrochn, des hast … ohne heid nu vier und mit heid nu fünf Tog do da. Was i daun anschließend (oiso glei auschließend) doa werd, was i nu ned wirkli. Feian woascheinli und schlafn. Und zum Zauhnarzt geh. Und jiatzt nimm i liaba nu a Tablettal. Zum Frühstück und so.

Ho i auf mein Hauptblog wieda amoi wos üba de schensten Plätze meina Heimat gschriem. Sie is jo wirkli fesch, mei Heimat. So sche blau und grün und gelb und ois zaum anfoch. I bin begeistert und werd’ vielleicht heit glei wieda zum See schaun und mi bräunen lassen. Oba moi schaun, ob ned da Reng do nu kimmt. So sicha is de Wettervorhersog ned wirkli.

Oba bei mia is hoid imma so, dass i so richti aufleb, wenn i vu da Sonn bestroit werd. Am liabsten darad i mi gar ned geng UVau-Stroin schützen, weil grod des für mi so fü Energie hervorruaft. Des is a Wahnsinn. Ehrlich. Najo, s’Lem zurzeit is hoid voi bunt und de Pläne fia de nächsten Wochen san a scho geschmiedet. I werd woi in de nächsten fünfazwanzg Tod drei- bis viamoi noch Wien foan, und amoi werd’ i innahoib von zwa Tog durch gaunz Österreich reisen. Weil ma hoid sunst so fad is, und i a wengal a Beschäftigung brauch. Oba sunst … najo. De Sonn scheint.