Dei Lochn. I hob’s nu imma in Erinnerung. So unvagesslich und so einzigartig. Wia soi des netta weidageh. Jetzt, noch so fü Tog und so fü Wochn. I wü di ned vagessn. Oba i schoffs a koan Tog, wie i ned zehn oder zwanzg Moi an di denk. Egal wo i hischau, ois erinnert ma an di. Wie soid i do nur irgendwia fertigwern mit oi dem Schmerz und oi de Gedaunken.

Aufoamoi warst du weg und mein Wunsch, di nuamoi zu seng, bereu i beinahe jeden Tog. Wia du do dortgleng bist, so koid, so zart. Dei Haut so sanft, dei Körpa so tot. Nia werd i des Büd vagessn, nia wieda werd i an di denka kinna, ohne a des letzte Büdl mit dia zu seng. Des geht nimma weg und es duat weh. So vadaumt weh, wia si des nur gaunz wenige vorstön kinnan.

Wei a bissal Glick fia di nu laung ned reicht. I wünsch da, dass da guad geht. Wünsch ma, dasd amoi lochst, nur fia mi. I wünsch ma, dass i di irgendwaun wieda moi gspia. Dei Wärm und deine wundaschen Aung seng kau. I wünsch da nua des Beste, und hoff, dass uns, de do bleim haum miasn, dass irgendwaun a uns wieda guad geht. Oba wos sog i, es wiad nia wieda so sei, wia’s scho amoi woa. Nia wieda wird mei Mama so wunschlos glückli sei, so befreit lochn, wias sis mit dia dau hot. Nia wieda wiad mei Papa a so großartiga Großvota sei und nia wiada wird dei Mama a gaunz a normales, glückliches Lem führn. Und i werd woi a jeden Tog an di denka.

Fia di reicht ka bissal Glick. Du soist ois Glick da Wöd erfahrn. Dia sois so guad geh, jiatzt, wo du weg bist, und i oiwei glaubt hob, i kau di vor oim Schlimmn beschützen. I hos ned kinna. Und dafür schenk’ i da mei Herz, und meine Gedaunkn. I schenk da oi mei Liebe und an Kuss schick i da a. Du warst a außagewöhnlicha Mensch und i kau nua oiwei jeden Text üba di mit de Worte beendn: I lieb’ di. Fia imma. Und i gfrei mi scho drauf, wenn ma uns endli wiedasehn.

A Joa is jiatzt aus, seit da Timi, mei Neffe, gstoam is. Den Text hob i scho vor längara Zeit gschriem, und jiatzt is er hoid a do. 
Veröffentlicht in Aus'n Lem ]]> http://palatschinknundblunzn.wordpress.com/2008/10/29/weil-a-bissal-glick-fia-di-nu-laung-ned-reicht/feed/ 0 just4ikarus http://palatschinknundblunzn.wordpress.com/2008/04/29/wean-is-hoid-amoi-aundas/ http://palatschinknundblunzn.wordpress.com/2008/04/29/wean-is-hoid-amoi-aundas/#comments Tue, 29 Apr 2008 18:11:49 +0000 Dominik Leitner http://palatschinknundblunzn.wordpress.com/?p=10 ]]> I gibs jo zua, i woa scho lenga nimma do und ho ma denkt, wos soid i übahaupt. Hod jo do kan Sinn wenn i über wos schreib, wos ned is und wos nia sei wird, weil i jo nix doa kau, wenn i schreib. Vastehst mi? Najo. So oda so ähnlich is ma a gaunga, wia i am Saumstog mit meine Eltan und meina Schwesta noch Wean gfoan bin. I woa nu nia mit meina Familie in Wean. Neva Eva. Is scho wüd. Zwar hauma uns mei Großcousine oda so, des Verwandschoftsverhältnis muas i ma nu genau anschaun, weil so groß is ned, und im Gegensotz zu mia sogar relativ kloa, aungschaut und daun haums mi obgliefat. I soid ma zwa Konzerte aunschaun, homs gsogt und i hob ma ned na song traut, und so bin i hoid am Samstog und am Sunntog beim Adam Grean und beim Klüso gwesen. Woa scho cool, kauma nix song. Und dazwischen ho i gschlofn, mi verennt und auf da Donauinsel. Oiso es woan wirkli supa Tog, wirkli. Und jiatzt bin i wieda zruck und werd nu schlofn und sche drama und irgendwann foa i donn wieda noch Wean. Oba ka Aungst, a ned foreva.

Oba damit i hoibwegs normal durch’n Tog kimm, nimm i hoid entweder Aspirin oder Parkamed. Und wauns grod amoi gaunz schlimm is, nimm i hoid jeweils zwa. Des is zwoa ned so guad, oba is hoid a a Möglikeit, dass i durchin Tog kimm. Jiatzt is übrigens grod de letzte Wochn vom Züvüdienst aubrochn, des hast … ohne heid nu vier und mit heid nu fünf Tog do da. Was i daun anschließend (oiso glei auschließend) doa werd, was i nu ned wirkli. Feian woascheinli und schlafn. Und zum Zauhnarzt geh. Und jiatzt nimm i liaba nu a Tablettal. Zum Frühstück und so.

Oba bei mia is hoid imma so, dass i so richti aufleb, wenn i vu da Sonn bestroit werd. Am liabsten darad i mi gar ned geng UVau-Stroin schützen, weil grod des für mi so fü Energie hervorruaft. Des is a Wahnsinn. Ehrlich. Najo, s’Lem zurzeit is hoid voi bunt und de Pläne fia de nächsten Wochen san a scho geschmiedet. I werd woi in de nächsten fünfazwanzg Tod drei- bis viamoi noch Wien foan, und amoi werd’ i innahoib von zwa Tog durch gaunz Österreich reisen. Weil ma hoid sunst so fad is, und i a wengal a Beschäftigung brauch. Oba sunst … najo. De Sonn scheint.

De letztn Tog, oiso vor oim des Wochenend war i a ganzes bissal dezent vawirrt und desweng hätt i fost auf drei Termine vagessn und an hob i daun wirkli voikommn vablosn. Na ehrlich. Manchmoi bin i zu fast goa nix zu gebrauchen. Oba des is ma schlussendlich eigentli a wuascht, weil wenn i amoi wos vagiss hob i wenigstens de Ausred, dass des in meine Gene so vorgschriem is.

Jiatzt ho i nur mehr a boa Tog und daun is mei Züvüdienst entgültig vorbei. Irgendwia gfrei i mi scho recht gscheid drauf, oba wia des hoid bei mir so normal is, hob i a a wengal Aungst vorm Ende. Oba wos ma heid so gschossn is … de letztn Toge des Aprü, do kinnad i jo, alleine wohlgemerkt, durch ganz Österreich fahren. Durch jedes Bundesland, mitn Zug und jeweils einem Stopp. Des warads jo. Daun darad i wenigsten mei Heimat wieda a wengal bessa kennalerna. Und so loss i eich mit dem Gedanken allein und pfiat eich so richtig gscheid.

Es geht ma guad, weil i am Montog so wunderboa glickli war. Weils Wetta sche war und i anfoch nur voi motiviert. Und seitdem i mi a wengal mehr mit mir befoss, oiso auf mi ocht und schau dass ma anfoch nur guad geht. Wos kinnt i eich do nu vazöhn. Heid war i wieda amoi in meina oidn Schui. Es war ganz cool, nur hoid a wengal komisch, so ois der Typ, der’s gschofft hot. De ocht oda nei Joa zu übasteh. Und des Treffn mit meina besten Freindin war wirkli bemerkenswert lustig. So wie oiwei eben. Jo, und jetzt is Mittanocht a scho fost wieda vorbei und desweng verobschied i mi scho wieder. Afoch so.

I woas jo gar ned, ob i überhaupt richtig Mundart schreim kau. Oba normalerweis is des jo so a Soch, wo ma nix foisch mocha kau. Weil Mundart is jo a sehr regionsspezifisch, wia ma so sche sogt. Des is oiso mei Mundart. A wengal wos aus Pinsdorf und daun a nu a ochtmonatiga Einschlog aus Goisern, und des haubts daun do.

Wiakli oft werd i mi do wahrscheinli a ned mödn, weil andere, internationalere Blogs daun hoid scho Vorraung haum. De daun ned nua a Minderheit hoibwegs vastengan, sondern hoid de gaunze Wöt, wos normal deitsch kinnan. Vielleicht a bis zwa moi wöchentli hätt i Zeit. Und daun kunnad i jo eigentli üba oisi schreim. Üba mei Lem und de Liabe, über Freindschaft und meine Dram. Wos hoid so aufoit. Und vielleicht mochi a nu a klane Expedition rund durch Goisan, um ans vu de grestn Kaffs vorzstöhn.

Wenn’s eich gfoit, dann gfrei i mi. Und da Dschü wi jiatzt nu auf dem Wege song. Wehe.