Jiatzt is scho fast da Mai und da Frühling wü goa ned kemma. Heid in da Fruah hots bei uns wieda amoi gschniem und des hot ma jo sowos von gar ned taugt. Wia waun des Wetta ma wos z’Fleiß darad. Weil i bin jo eha da Frühlingstyp. Und Winter is jo so gar ned mei Soch. Oba jiatzt sois jo wenigstens in de nächsten Tog a wengal wärma und schena und mit mehr Sunn.

De letztn Tog, oiso vor oim des Wochenend war i a ganzes bissal dezent vawirrt und desweng hätt i fost auf drei Termine vagessn und an hob i daun wirkli voikommn vablosn. Na ehrlich. Manchmoi bin i zu fast goa nix zu gebrauchen. Oba des is ma schlussendlich eigentli a wuascht, weil wenn i amoi wos vagiss hob i wenigstens de Ausred, dass des in meine Gene so vorgschriem is.

Jiatzt ho i nur mehr a boa Tog und daun is mei Züvüdienst entgültig vorbei. Irgendwia gfrei i mi scho recht gscheid drauf, oba wia des hoid bei mir so normal is, hob i a a wengal Aungst vorm Ende. Oba wos ma heid so gschossn is … de letztn Toge des Aprü, do kinnad i jo, alleine wohlgemerkt, durch ganz Österreich fahren. Durch jedes Bundesland, mitn Zug und jeweils einem Stopp. Des warads jo. Daun darad i wenigsten mei Heimat wieda a wengal bessa kennalerna. Und so loss i eich mit dem Gedanken allein und pfiat eich so richtig gscheid.